Mujaddide Islam ( Revivers )

Mujaddide islam

Qur'an: Aye Eimaan walo, ALLAH ki ita’at karo aur Rasool ki ita’at karo aur (apno me se) saahibane amr ki aur phir kisi mas’ale par tum baham ikhtelaf karo to use Allah aur uske Rasool sallallahu alaihi wasallam ki taraf lauta do, Agar tum ALLAH par aur aakhirat ke din par yaqeen rakhte ho to yehi (tumhare liye) behtar aur anjam ke lihaj se bahut achha hai.
[ 4 Surah an-Nisa Aayat 59 ]

Ya’ni ALLAH ta’ala farmata hai tum me ilm walo ke upar ilm wala hoga jo tumhare liye sahibane amr hoga aur jo tumhe ALLAH aur uske Rasool sallallahu alaihi wasallam ki ita’at ka sahi tareeqa sikhaenge. Aam halaat me us Imam ki ita’at karte raho aur jab kisi mas’ale par ikhtelaf ho jae to Qur’an aur Sunnat ki taraf ruju karo.

DeeniRaah.blogspot.com

•• Mujaddide Islam (Revivers) ••

Hadeese Nabawi : 

(1) Hazrat Abu Huraira Radiallahu ta’ala anhu se riwayat hai ki Har sadi ke khatm hone par is ummat ke liye ALLAH ta’ala ek aise shakhs ko bhejega jo uske liye uske deen ko nikharta rahega.
(Sunan Abu Dawood, Jild -37, Kitab al-Malahim, Hadees -4278)

(2) Ulma e ummatika ambiya e bani israeel.
Meri ummat ke ulema bani israeel ke nabio ke manind hai.

(3) Jab Qur’an aur Sunnat me kisi mas’ale ka hukm na mile to fuqha aur mujtahidin ulema ke mashware par amal (pairwi) karo. 

Jab islam me buri bid’ate aur fitne wa ikhtelaf badhne lagte hain to ALLAH ta’ala kisi mujaddid ko bhejta hai, jise khas ilm ata farmata hai jis se wo kisi baat ko sunkar ya kisi chiz ko dekhkar aisa soch sakta hai jo dusre nahi soch sakte aur us khas ilm se wo islam me se buri bid’ato ko door karke musalmano ko sahi aqeede aur sahi amal sikhata hai aur Ahle sunnat wal jama’at ka sahi rasta dikhata hai.
Aur ALLAH ta’ala uske zariye deene islam ko phir se taaza karta hai aur logo ko hidayat ata farmata hai. 

Mujaddid mein chand khaas baatein hona zaroori hai : 

(1) Mujaddid 2 sadi ka hissa paata hai, ek sadi ke aakhri arse me paida hota hai aur dusri sadi me mashhoor hota hai. 

(2) Wo taqdeer se mujaddid banta hai, tehreer se nahi.
ALLAH ta’ala use Shariat aur Ma'arefat aur Tareeqat ke ilm ke saath dusre fan ka ilm wa hikmat ata farmata hai. 

(3) Wo sunni sahihul aqeeda hota hai aur hamesha ta’azeeme rasool aur pairwi e rasool karta hai.

(4) Use dunya ke maal ki koi laalach ya kisi bhi tarah ka khauf nahi hota.
Wo hamesha shariate islam par amal karta hai aur buri bid’ato ko door karke Sunnat tareeqa sikhata hai aur ALLAH ki raza ke liye Deene islam ki khidmat karta hai.
Wo itna bahadur aur aalim hota hai, jo sharai faisla aur hudood jaari kar sake aur musalmano ke jaano maal aur mulk ki hifazat kar sake aur zalim se mazloom ko haq dila sake.

(5) Us zamane ke ulema aur uske baad ke zamane ke ulema bhi uske ilm aur amal se faida hasil karte hain aur use mujaddid maante hain. 

Mujaddide Islam (Revivers) : 

Har sadi me ALLAH ta’ala ek ya zyada mujaddid ko bhejta hai.

Pehli sadi :
(1) Imam Umar bin Abdul Azeez
(2) Imam Abu Bakr Muhammad ibn Sireen al-Ansari (radiallahu anhuma).

Dusri sadi :
(1) Imam Hasan Basri
(2) Imam Abu Haneefa an-Numaan
(3) Imam Muhammad bin Hassan Shaibani
(4) Imam Maalik bin Anas
(5) Imam Abdullah bin Idrees Shafi'i (radiallahu anhuma).

Teesri sadi :
(1) Imam Abul Hasan al-Ash'ari bin Umar
(2) Imam Ahmad bin Hambal (radi Allahu anhuma).

Chothi sadi :
(1) Imam al-Bayhaqi
(2) Imam Tahtaawi
(3) Imam Isma'eel bin Hammaad Ja'fari
(4) Imam Abu Jaafar bin Jareer Tibri
(5) Imam Abu Haatim Raazi (radiallahu ta’ala anhuma).

5wi sadi:
(1) Gause aazam Abdul Qadir Jeelani 
(2) Imam Abu Naeem Isfahani
(3) Imam Abul Husain Ahmad bin Muhammad Abi Bakr-il-Qaadir
(4) Imam Hussain bin Raaghib
(5) Imam Muhammad bin Muhammad Ghazzali (radiallahu ta’ala anhuma).

Chhathi sadi :
(1) Imam Abul Fazl Umar Raazi
(2) Imam Shaikh Ahmad Kabir Rifaee
(3) Imam Allama Umar Nasfi
(4) Imam Qaazi Fakhruddeen Hassan Mansoor
(5) Imam Abu Muhammad Hussain bin Mas'ood Fara'a (radiallahu ta’ala anhuma).

7wi sadi :
(1) Imam Taqiyuddin as-Subki
(2) Imam Shaikh Shahbuddeen Suharwardi
(3) Imam Allama Abul Fazl Jamaaluddeen Muhammad Afriqi Misri
(4) Khwaja Mohyuddeen Chishti Ajmeri
(5) Imam Abul Hasan Uzzuddeen Ali bin Muhammad Ibn Aseer
(6) Imam Shaikh Akbar Mohyuddeen Muhammad ibn Arabi (radiallahu ta’ala anhuma).

8wi sadi :
(1) Imam Ibn Hajar al-'Asqalani
(2) Imam Taajuddeen bin Ata'ullah Sikandari
(3) Khwaja Nizaamuddeen Auliya Mahboobe Ilahi
(4) Imam Umar bin Mas'ood Taftazaani (radi Allahu anhum)

9wi sadi :
(1) Imam Hafiz Jallaluddeen Abu Bakr Abdur Rahmaan Suyuti
(2) Imam Nooruddeen bin Ahmad Misri
(3) Imam Muhammad bin Yusuf Karmani
(4) Imam Shamsuddeen Abul Kheyr Muhammad bin Abdur Rahmaan Sakhawi
(5) Imam Allama Sayyed Shareef Ali bin Muhammad Jarmaani (radiallahu ta’ala anhuma).

10wi sadi :
(1) Imam Shahabuddeen Abu Bakr Ahmad bin Muhammad Khatib Qistalaani
(2) Imam Muhammad Sharbini
(3) Imam Allama Shaikh Muhammad Taahir Muhaddees (radiallahu ta’ala anhuma).

11wi sadi :
(1) Imam Shaikh Ahmad Sarhindi Mujaddide Alfe Saani
(2) Imam Ali bin Sultaan Qaari
(3) Imam Sultaanul Arifeen Muhammad Baahu (radiallahu ta’ala anhuma).

12wi sadi :
(1) Imam Abul Muzaffar Muhyuddeen Muhammad
(2) Imam Allama Abul Hassan Muhammad bin Abdul Haadi Sindhi
(3) Imam Abdul Ghani Naablisi
(4) Imam Shaikh Ahmad Mulla Jeewan
(5) Aurangzaib Alamgir Mughal (radiallahu ta’ala anhuma).

13wi sadi :
(1) Imam Abdul Ali Luckhnowi
(2) Imam Shaikh Ahmad Saadi Maaliki
(3) Imam Allamah Ahmad bin Ismaeel Tahtaawi
(4) Imam Allama Shah Abdul Azeez Muhaddeese Delahwi (radiallahu ta’ala anhuma).

14wi sadi :
(1) Imam Ahmad Raza Khan Aa’la Hazrat
(2) Imam Shaikh Yusuf bin Ismail bin Muhammad Nasiruddeen an-Nabhani
(3) Imam Shaikh Badruddeen al-Hasani Muhaddees al-Akbar(radiallahu ta’ala anhuma). 

ALLAH ta’ala uske Habeeb sallallahu alaihi wasallam ke sadqe me Aur tamam Mujaddid aur Aaimma e islam ke waseele se Sab ko mukammal ishqe rasool ata farmae aur Sab ko hidayat ata farmae aur Sab ke Eimaan ki hifazat farmae aur Sab ko nek amal karne ki taufiq ata farmae aur Sab ko dunya wa aakhirat me kaamyabi ata farmae aur Sab ki nek jaiz murado ko puri farmae.
Aameen.

Read More

Qaza Namaz Padhne ka Tareeqa Aur Ahkaam

Qur'an: Ye Kitab (Qur'an) Hidayat hai parhezgaaro ko, jo Ghayb par eiman late aur Namaz qaayem rakhte aur hamne jo diya usme se hamari rah me kharch karte hai.
[ Surat 2 (Baqarah), Ayat 3 ]

Qur'an: Namaz Allah se darne waalo ke siwa sab par bhari hai.
[ Part 1, Surat 2 (Baqarah), Ayat 45 ]

HUZUR {ѕαℓαℓℓαн нυ αℓℓαyнι ωαѕαℓℓαм} Ne Farmaya:
" Qayamat Ke din Bande Ke A'amal me sab se pahele 'NAMAZ' ka suwal hoga, Agar Woh Durust Hui To usne Qamyabi Pai Aur Agar usme kami hui to Woh Ruswa Hua Or Usne Nuksan Uthaya"
[ KANZUL-UMAL JILD:7 SAFA: 115 HADEES: 18883 Darool-kutbul-ilmiya-BAIRUT ]

•• Qaza namaz padhne ka Tareeqa aur Ahkam ••

Qaza namaz padhne ka Tareeqa aur Ahkam :

Musalman ko din me 5 bar waqt par namaz padhna farz hai. Aur har namaz uske waqt par ada karna zaroori hai.

Behtar hai ke puri koshish kare ke masjid me jaakar ba-jama’at namaz padhte rahe. Aur agar jama’at chhut jaae to masjid me tanha namaz ada kar sakte hain. Agar koi jaiz uzr ho to ghar par namaz padh sakte hain.
Aurto ko bhi waqt par ghar me namaz padhna zaroori hai.

Agar waqt bahut kam ho to us waqt ki Farz namaz ki rak’at padh len. Aur Isha me Farz ke baad Witr wajib ki 3 rak’at padh len

.

Agar waqt ke dauran namaz na padhi to wo namaz kaza ho gai. Aur jab bhi us namaz padhe to kaza padhni hogi.

Aur jaanbuzkar namaz kaza karna gunahe kabirah hai.

Namaz na padhne wala Fasiq hai.
Aur Waqt par namaz na padhne wala ya hamesha kaza padhne wala Fajir hai.

Iske liye Allah ta’ala se sachi tauba bhi karni hogi. Aur aainda namaz kaza na ho uska pura khayal rakhna hoga. Aur wo sab namaze kaza ki niyyat se padhni hogi.

Ummid rakh sakte hain ke Allah ta’ala uske Habeeb sallallahu alaihi wasallam ke sadqe me muaf farma de.

Kaza namaz jald hi padh lena zaroori hai. Sirf raat ko hi ya kisi khas waqt me hi kaza namaz padh sakte hain aisa nahi. Jab bhi mauka mile apni kaza namaz padhte rahe take bariuz zimma ho jaae.

Namaz ke liye jo makrooh awqat hain usme kaza namaz nahi padh sakte.
Baqi pure din aur raat me jab bhi waqt mile kaza namaz padhte rahe.

Awam me jo galat fehmi hai ke ba’az khas awqat par ya Mubarak raato me ya dino me kaza e umri ki niyyat se jitni namaz padh sakte hain utni padh le to kaam ho jaaega.
Wo bilkul sahi nahi hai. Har namaz ki kaza har ek ki niyyat ke saath alag alag aur puri padhni hogi.

Jin ki kaza namaze baqi hain, un ke liye Nafl namaz padhne se behtar hai ke wo pehle apni Kaza namaze padh len, Take bariuz zimma ho jaae.

Farz namaz Allah ta’ala ka ham par Karz hai aur bande ko use dena hi hai. Jo waqt par namaz ada kar lete hain wo to khuskismat hain ke Allah ta’ala ki Ibadat ke zariye uske qareeb hote hain.

Lekin agar kisi bhi wajah se Namaz waqt par ada nahi ki ho to jald hi use Kaza karke bhi padh len.

Mubarak raato me aur dino me ham Allah ta’ala ki raza ke liye Nafl namaz aur Ibadat karte hain ye achhi baat hai.
Lekin pehle apni kaza namaz padhte rahen. Phir kuchh nafl namaz bhi padhen.
Haan, Farz namaz ke ilawa jo Nafl namaz roz padhte hain (Ishraq, Chasht, Awwabin, Tahajjud) wo uske waqt par padh len.

Kaza namaz padhne ka Tareeqa : 

Namaz ki kaza padhne ka tareeqa bhi waisa hi hai jaise waqt par namaz ada karte hain. Uske liye sare Sharait, Faraiz, Wajibat aur Sunnate wo hi hai. Ba-wuzu qibla roo khade hokar jo kaza namaz padhni ho uski niyyat kare. 

Farz ki kaza me Farz ki niyyat kare, Wajib ki kaza me wajib ki niyyat kare aur Sunnat ki kaze me sunnat ki niyyat karen. 

Agar yaad ho to jis waqt ki jo kaza namaz padh rahe ho uski niyyat kare.
Aur agar ziyada namaze kaza baqi ho to har baar jis waqt ki (Maslan : Fajr, Zohar, Asr, Maghrib, Isha) kaza namaz padhe uski niyyat me ye kahe ke 

‘Is waqt ki jo kaza namaze baqi hain us me se sab se pehli wali namaz ki kaza padh raha hu.’

Musafir ke liye 4 rak’at wali farz namaz me sirf 2 rak’at farz padhne ka hukm hai.
Is liye Safar ke dauran jo namaze kaza hui ho wo padhte waqt namaze kasr kaza padhen.

Niyyat ke baad Takbire tehrima, Phir Sana, Ta’awwuz, Tasmiyah, Surah al-Fatiha aur Qir’at ke baad Rukoo aur Sujood karke pehli rak’at puri karen aur phir isi tarah sab raka’ate puri karke Qa’ada e aakhirah ke baad salaam ferkar namaz khatm karen.

Agar bahut ziyada kaza namaze padhni baqi ho to Rukoo me 3 baar ke badle 1 baar Tasbih padhe aur Sajde me bhi 1 baar Tasbih padhe aur Qa’ada e aakhirah me Duroode Ibrahimi ke badle ‘Allahumm salle ala Sayyedena mohammadin wa ala aali mohammadin’ padhe aur puri Dua e maashura ke badle ‘Allhumm gfirlee’ padh sakte hain.

Aur Witr me puri Dua e Qunoot padhne ke badle ‘Allahumm rabbana aatena fid dunya hasanatanw wa fil aakhirati hasanatanw wa kina azaban naar’ padhe sakte hain. Aur agar waqt ho to kaza namaz me har chiz puri padhen. 

Allah ta’ala uske Habeeb sallallahu alaihi wasallam ke sadqe me sab ko sahi tareeqe se ba-jama’at namaze ada karne ki taufiq ata farmae aur Hamari ibadat ko qubool farmae.
Aameen. 

Read More